Friday, July 6, 2007

BULA VITI MAI AOTEAROA










Ni bula, Ni bula vinaka
Turaga na marama mai na veiyasana
Cauravou, goneyalewa na lalai
Ni bula, bula vinaka mai

Keimami mai via vakabula yani
Gone ni viti kece mai Niusiladi
Aotearoa na noqu yanuyanu
Isa Viti noqu dela ni yavu

Gone ni Viti era veicurumaki
Maori, Loma, Idia kei na Rabi
Gone ni Viti, Tokelau, Valagi
Aotearoa na neimami baravi

Keimami cavutu mai na veiyasana
Isa Rotuma, ko ciri vakayawa
Kadavu, Lau, Rewa kei Taveuni
Lomaiviti noqu parataisi

Viti Levu yanuyanu levu dina
Vuqa na yasana era tiko kina
Serua Namosi Naitasiri
Tailevu tou toka veiraviti

Ra, Ba, vata kei Nadroga
Wili kina o Navosa
Ratou mai na yasayasa vaka ra
Sa yadra, muju cola vina!

Vanua Levu e ciri vakayawa
Cakaudrove, Bua kei Macuata
Kioa, Rabi eratou wili vata
Bula si'a, Bula re, Bula vina'a

Keimami mai via vakabula
Vei kemuni yadudua
Turaga na marama mai na veivanua
Ni bula, ni sa bula!

BULA!

Composed by Kali & Tarisi Vunidilo

Friday, June 22, 2007

Serekali (Poem) by Tony Qalivutu

BULA MAI NA KORO

Dua na maile ki nakoro
Au tu ena delana kau vakarorogo
Tamela ni kaukamea esa cabolo
Kei na veivalivali e yasa ni koro

Dua na miniti noqu tu
Cagi mai na ceva kena ceva ruru
Laveta nai vua meu gole yani
Ratou veitavaki noqu veitinani

Tau nai vua e yasa ni vale
Rorogo mai edua na kaci
Dua na bilo noqu Tavale
Sa vakarau me sa taki

Na veiwali esa calidi
Neitou qase kei na nodra dui tini
Vivi balavu toka na tavako ni Viti
Yasa ni lalaga cabolo ni kasivi

Veivosaki esa totoka
Na qito au taroga
Tekivu ekea na veitalanoa
Ni sikoa vakatini ko Serevi ena dua ga na kona

Tini karua mai na kaloko
Sa malumu nai cobo
Pakete maji kei na tavako lala
Rorogo ni co kena wa masamasa
Sega ni tatau o vuni turaga

Au kere vakacegu lei Tavale
Mataka ni kua meu qaqasemake
Loga ni uvi esa sobi
Gunu yaqona oqo e sega ni oti

Kua ni leqa noqu Tavale
Daru qai gole vata ki nomu vale
Au na vukei iko ena yalo dina
Gunu yaqona oqo, yaco ga na siga




Monday, May 28, 2007

Serekali (Poem) by Peni Seru


Ko Viti – Na Parataisi

Ni rogoca saka meu tei serelaka
Na vanua au dau cibitaka
Ko Viti na noqu vanua domoni
Dau I wewe ni gusuqu tu ena siga kei na bogi

Nuku vulavula na kena matasawa
Wavokita tu na waitui karakarawa
Na dela ni wai siliva ena veibogi
Nai boi ni senikau e totoka vakaoti

E vutu ni yau na noqu vanua
E na sasalu ni waitui kei na veika bula
Ika, vivili,dairo, mana kei na kuka
Isa lei na dalo caliva ni noqu vanua

Oilei na rourou ni Wainibuka
Na kai ni Nakini, mai Verata na duruka
Na bila ni Naila au na dau nanuma
Naitasiri na boka matua

Waitui kei na kena cakau bula
Ki vanua na vuata era vua
Na vanua domoni na noqu vanua
Na nodrai gadigadi na saravanua

Era mata dredredre na kena tamata
Tini ka va taucoko na kena yasana
Na vei manumanu kei na senikau era tukuna
Ko Viti na parataisi bulabula

Noqu serekali me sa tini mada
Au vakamoce saka vei kemuni na wekada
Ni qai nanumi Viti na noda vanua vinaka
Na nodrai nuinui bula na noda kawa ni mataka

Isa Viti, na noqu Viti
Sega wale ga ni veivakadiridaini
Na kemuni totoka e rui uasivi
Na vanua domoni, na noqu Parataisi
………………………………………………………………………………………..


By, Peni D Seru, University of Waikato, Hamilton, NZ.